Dýpdarkort

Landsverkfrøðingurin

Avgerðandi fyri at fáa neyv úrslit frá modellinum er at dýpið er kent í hvørjum einstøkum rúti í rútanetinum. Fyri at fáa best møgulig dýpi í simuleringunum eru dýbdarmátingarnar, sum Landsverkfrøðingurin hevur framt inni á firðum og sundum, umframt dýpdarloggingar gjørdar hvørt 5 sek síðani ársbyrjan av 1999 við Magnusi Heinasyni og eisini við Tjaldrinum síðani Mars mánað í ár 2000, savnaðar í ein dátugrunn.

Dýpdarkortini eru gjørd til teldusimuleringarnar av sjóvarfallinum, og vísa kortini miðaldýpi í 100 m x 100 m stórum kvadratum. Í støðum, har ongar mátingar eru tøkar, er interpolerað frá næsta kvadrati, har mátingar eru tøkar.

Magnus Heinason

Uttan fyri økini, sum Landsverfrøðingurin hevði mált upp, var lítið av taltilfari, tá verkætlanin byrjaði. Tí varð farið undir at savna dýpdarloggingar, sum vórðu gjørdar við ekkoloddinum umborð á Magnusi Heinasyni, og tilhoyrandi positiónir frá GPS-inum umborð. Henda skipan fór at virka regluliga við ársbyrjan av 1999 og er ein dýpdarlogging gjørd umleið hvørt 5 sek, tá skipið hevur verið úti síðani tá. Slóðin á innaru leiðunum hjá Magnusi Heinasyni er víst á myndini til høgru.

Tjaldrið

Í mars mánað í ár 2000 varð ein líknandi skipan fingin at virka umborð á Tjaldrinum hjá Vaktar og Bjargingartænastuni, sum gevur eina dýpdarlogging, hvørja ferð skipið hevur flutt seg 10 m. Slóðin, har dýpdarlogging er framd við Tjaldrinum í ár 2000, er víst á myndini til høgru.

Tjaldrið + Magnus Heinason

Myndin til høgru vísir allar slóðir, har dýpið var mátað við árslok í ár 2000, og sum eru nýttar til at gera dýpdarkortini, sum eru brúkt í simuleringunum av sjóvarfallinum. Hesi kortini eru framleidd við at taka miðal dýpið av øllum mátingum innan fyri eitt kvadrat uppá 100 x 100 m. Fyri tey kvadratir, har eingin máting er, er eitt dýpi funnið við at interpolerað frá umliggjandi kvadratum. Hesi kortini eru tey, sum eru víst sum dýpdarkort í hesari kunningarskipanini.